Ziklo-krosarekin gozatzea helburu, lokatzetan murgilduta dabil Arrikrutz Aloña Mendi.

  goiena

Ziklo-kros denboraldia martxan da, eta ondorioz, baita Arrikrutz Aloña Mendi taldea ere. Hamarkada baten ostean Oñatiko lasterketak "atseden urtea" izango duen arren, bost gaztek dihardute inguruko herrietan pedalei eragiten. "Emaitzetatik harago, gozatzea dugu helburu", baina emaitzek laguntzen dutenean, errazago izan ohi da lokatz, eskailera eta oztopo artean murgiltzea; Alex Beristain Gipuzkoako txapeldun izan berri da kadete mailan, eta Aimar Madina ere podiumaren bigarren koskara igo zen junior kategorian.

San Martingo zuhaiztian egindako teknifikazio entrenamendu batean izan da Julen Iriondo kazetaria, Hemen Debagoiena saioan txirrindulari zein teknikarien jarduna gertuagotik ezagutu asmoz.